Rede Lucense de Voluntariado, da que forma parte o Servizo de Participación e Integración Universitaria da USC, organiza este venres 5 de decembro unha xornada lúdica no Museo Provincial de Lugo, co gallo do Día Internacional do Voluntariado.
O programa de actos ábrese ás 16.30 horas cun acto de benvida ás persoas que se acheguen ao Museo Provincial de Lugo, onde de seguido se desenvolverá unha xincana sobre o valor da acción voluntaria en Lugo e que vén ser o “froito da solidariedade” co que se lle da título a esta xornada.
Xa dentro dos actos centrais, esta xornada conta tamén cunha intervención da Compañía de Danza da USC-Lugo, dirixida por Juan Carlos Zahera na que os seus integrantes realizarán unha performance sobre o valor simbólico do voluntariado a partir das 18.00 horas. Ao remate desta actuación, darase lectura ao manifesto do día do voluntariado.
Todos os actos organizados ao abeiro desta xornada co gallo do Día Internacional do Voluntariado teñen de fío condutor a historia dun carballo centenario. A voz protagonista do relato ‘Sementa unha idea’, escrito por Gloria López Castro pon o seu acento no valor da cooperación e o voluntariado.